有「鬼王」之稱嘅靈異節目主持人潘紹聰，早前被貼大字報，當中牽涉一間名為「灰熊娛樂」及被指係「坪洲之恥」 嘅男子陳x鋒。大字報指潘紹聰「聯同」呢位陳先生，呃人投資兼涉及洗黑錢。事件發展到噚日開始喺Facebook各群組內流傳。

當事人嘅潘紹聰噚晚8點幾去咗旺角警署備案（檔案編號:18071680），對事件佢笑言感到莫名奇妙。報案後佢接受《蘋果》訪問，佢話唔識相中男子及對「陳x鋒」呢個名冇印象，佢話：「其實噚日朝早已經有聽眾將啲相關圖片send畀我，最初我覺得自己唔識相中人，成件事亦唔關我事，所以不以為然，點知去到傍晚，陸續有同事話喺唔同嘅facebook群組都見到呢張相，我覺得事態嚴重，諮詢過法律意見後，決定去警署備案。」

講到呢間灰熊娛樂，潘紹聰話兩年前拍過一套栢芝媽有份演出嘅電影《魕異》，其中有份投資就係呢間公司，佢話：「電影製片同我提過其中一個投資方就係叫灰熊娛樂，但係我其實從來冇見過灰熊娛樂嘅老闆或相關職員。坦白講，呢套戲嘅片酬我都未收齊，嗰度都成兩萬蚊，試問我又點樣去呃錢？」 佢補充話事後都有聯絡過電影製片，但係對方同佢一樣都覺得莫名其妙。

至於呢張合照，潘紹聰就話：「我睇番應該係喺呢套戲嘅慶功宴上影，因為我揸住支酒，當時慶功宴上有好多人同我影相，所以我都唔記得佢係邊個。」佢仲話：「雖然被貼大字報，但係暫時我冇乜嘢損失，亦都冇任何人搵過我！」

精選娛聞，喺晒《娛果》
http://fb.com/appledailyent