夏蕙姨之前為咗慈善搞嘅演唱會忙到暈低入廠，今日呢個騷終於上演喇，傍晚佢仲同埋八兩金、祥嫂同埋囡囡黃泳倫等等一齊喺新光戲院切燒豬拜神。

夏蕙姨同阿囡兩個今次係首次一齊喺香港演出，由美國返港嘅黃泳倫就話媽咪好有魄力，以佢為榮，仲希望可以同媽咪喺美國走埠表演。上次夏蕙姨忙到暈低入院，黃泳倫就話媽咪最鍾意忙，休息對佢嚟講先唔好喎。

至於八両金個仔早前就被指同女朋友喺公園錫錫，八両金就話阿仔性格怕醜，啲女朋友仲因呢件事散晒，又話自己31歲先破處，有教阿仔正確性教育，對女仔要nice，大家聯絡吓感情就好，搞到有餡就唔知點算。

八両金又話阿仔好自律嘅，不過就因為女方以為佢叫記者偷拍搞到分手，所以喊晒，今日仲費事出席添。