唔係話特別想幫個市講好話，個如果一日港股跌近561點、A股跌近5.4%，就好驚的話，睇嚟今日開始應該沽哂啲股票，將啲現鈔提出嚟放入床下底好過，就算今日係升市轉跌急插都，都應該用「係咩？碰！」嘅心態看待。

噚日睇到大行大合唱A股、中資金融股、同埋港交所（388），通常咁唱法第二日都會跌。睇到，冇留意到，我大意、我抵打！

另一指標係，今日有新財經雜誌「港股策略王」出版，今朝見臉書已經好多人講，然後A股下午急跌。呢個原因本欄唔係咁信，但今日的確係咁。

返正題，今日A股跌5.4%，好似好多，但其實自2000年計，今日跌幅只係排第15。當然你可能會話金融海潚成日都大跌，牛市好少可會咁跌法。但07年大牛市，其實分別試過三次跌幅勁過今日，分別係二月、五月同八月，跌得最甘係2月27日。

今日同07年2月嗰次大跌最似：一、咁啱又係「黑色星期二」；二、當時A股又係一輪由2600點急升至3000點，咁啱一掂3000點就急插；三、當日剪報話冇先兆大瀉，今日都冇乜原因（但今日跌因可能係中證監不准未達3A的企業債作抵押，仲有馬化騰減持騰訊（700））。

大市基本因素冇改善，每日升跌難搵原因，要搵嘢自圓其說，就係搵往績。暫時唔使太畀每日升跌影響到情緒住，08年6000點回落嚟，到要用1年先到2000點，要逃走的話，總會有位畀你走、總會跌到你心淡離場，爭在你到時捨唔捨得放手啫！

高明

神奇‧頂級‧超卓，盡在偶像派財演高明Facebook專頁：
https://www.facebook.com/BigRiceTea