朋友話，為咗鼓勵線人報料舉報企業違規活動，原來金改法案大大增加咗做大行無間道嘅着數！若果個報料人真係能夠提供一手資料，幫到當局檢控違規企業，當局就會撥出部份罰款作為獎賞，據當地傳媒係咁易估計，若果涉案企業面對巨額罰款，線人隨時有成百零二百萬美金落袋，成為百萬富翁。
吓！咁咪郁吓都成過千萬港紙？即係擺明車馬用錢引誘人做二五仔。美國通朋友本身喺嗰邊做大狀，佢話所謂有錢使得鬼推磨！當局咁做，必然多咗好多人報料，報串指數唔升到成支穿雲箭咁就奇，佢仲唔接job接到手軟咩？
之但係華爾街大行就肯定無運行囉！一個二個牙痛咁聲，認為多咗咁多猶大玩出賣，律師費、訴訟費條數好襟計。佢哋仲係咁炮轟此舉等如變相鼓勵啲人得閒無事走去放流料，講真一句，無端白事惹禍上身又真係好唔老利，打得甩又點，告唔入都嚇到面青啦，仲要費時失事㖭﹗
李華華
mailto:
[email protected]