律政新人王黃仁龍當紅，噚日由早到晚都見到佢。朝早會見完南韓國會議員後，傍晚又去到中環愛丁堡廣場出席法律年度開幕禮，其間黃仁龍未見任何疲態，四十二歲嘅後生仔果然零舍唔同。
黃仁龍嘅處女講詞，老實講，真係一如其人──四平八穩，冇乜特別，反而台下就有多啲驚喜。第一次以司長身份出席法律年開幕咁大件事喎，黃仁龍舉家，包括佢太太、父母以及外父原來都有出席撐場，喺台下暗暗發功支持。
司長夫人陳筱茵平日好少蒲頭，噚日着得靚一靚咁罕有露面。雖則冇應酬記者幾句，保持低調作風，但就同詩姐喺台下雞啄唔斷，唔通女人走埋一堆，就真係有無窮無盡嘅話題可以講？
除咗有屋企人瞓身支持，噚日亦係黃仁龍初次同「師傅」李國能同台主持法律年。對住呢個愛將，李官致辭時都讚不絕口，話愛徒才德兼備、工作有熱誠、備受各界敬重，又話佢願意承擔司長重任，得到廣泛支持同稱譽。好明顯李官都為愛徒有此成就而開心啦。

李官讚詩姐貢獻重大

讚完黃仁龍，李官又點能不提已退休嘅詩姐呢。雖然詩姐任內搞出三次人大釋法，但李官似乎都前事不計，挺詩姐在任八年，一直盡忠職守，工作不遺餘力，尤其喺法治同司法獨立方面，作出咗重大貢獻，認為外界應予以充份肯定。難道唔在位嘅人，通常都會令人緬懷，一如老董走後，大家力褒佢嘅好人作風一樣？

湯狀評仁龍「好安全」

仁龍哥同李官嘅演詞冇乜特別，湯家驊形容個個演詞都「好安全」，大律師公會主席戴啟思嗰篇都一樣，因為入面對好富爭議嘅釋法問題，只係用咗一、兩句講番，反而用上大部份時間，講咗一大堆法律技術問題。
戴大狀話，一九二○年前，律師用句號同分號時都好吝嗇，啲句字長到無倫，舉例指《證據條例》第三十一條，英文版條文接有三百五十一個字同無數豆號，但只有一個冒號同一個分號做連接，佢笑笑口話唔可以喺現場讀出嚟，否則大家都唔可以返屋企喇。
有法律界人士就話，記得當年梁家傑做大律師公會主席致辭時，不時針對住釋法等等關乎大家人權自由嘅嘢嚟講，估唔到𠵱家嘅致辭只係講埋啲芝麻綠豆嘅小事，真係愈講愈欷歔。


爆料熱線：29290000、27860099
報料傳真：26239278
報料電郵：[email protected]