【翁媳對立】金黃老爺袁弓夷VS藍絲新抱容海恩:想見就見
袁彌明容海恩袁弓夷
父女政見一致,他們會一齊上街表達訴求,爭取自由民主,守護香港,向共產黨說不,偏偏這個黃色家庭卻有個藍絲新抱、新民黨立法會議員容海恩,她今年初為袁家添了囡囡,爺爺提到孫女都會眉開眼笑。上月24日,袁弓夷想去探望孫女,卻在銅鑼灣撞正反《國安法》的遊行活動,防暴警為驅散巿民又喪放催淚彈,袁弓夷硬食TG。克警5.27在中環食晏時間向大批沒有裝備的市民和打工仔多次發射胡椒球槍,巿民為保命慌忙向蘭桂坊方向逃跑,袁弓夷日前接受《蘋果》專訪時,途經案發現場,眼前一切雖變得平靜如常,但那幕驚心動魄畫面卻歷歷在目。
袁弓夷和容海恩黃藍對立,撇開政見,老爺和新抱關係未至水火不容:「你睇到我成日都講自由民主,講法治,佢(容海恩)鍾意藍,佢鍾意乜嘢,係自由嚟,佢鍾意做乜都得,只要唔好傷害到人。我有一個精神,你只要唔係傷天害理,你做乜都得,係咪先?每個人可以追求自己理念,我點解要佢跟我啫?我又有我自由喎,你唔好唔畀我做喎,呢個信念,個個人都得,你係共產黨,我都話得,但你唔好傷害到我。」
一家人會同枱「融洽」食飯?袁弓夷說:「冇問題,唔方便講咪唔講囉,大家費事嗌交!」袁弓夷會被暗示封嘴嗎?「唔會,你見我講嘢邊有收掣,我都去到盡嘅,講嘢啫,我又唔係傷害你。」可擔心經常發表中立言論的兒子袁彌昌做「磨心」?「冇,我個仔都明理,佢讀咁多書。每個人做人方式唔一樣,有啲人鍾意和和氣氣,好似我就好激,每個人嘅表達唔一樣,佢心裏承受嘅亦唔一樣。有啲人好怕得罪人,你見到好多有錢人,出到嚟你佢叫佢點就點,即係佢唔想得罪人,幾有錢都係假嘅,每個人立場唔一樣,呢樣都係香港成功嘅理由,成功就係有自由,但唔好做啲嘢傷害香港人。我哋飯枱講政治都冇所謂,佢而家做緊嘅嘢,冇傷害我,佢有佢立場,我哋從來冇衝突過。」袁弓夷表示家人之間互相尊重,他續說:「有時候佢哋邊個唔想見到,家庭聚會可以自由出席,愛好同唔愛好都係可以個人自由選擇。」總之袁家上下,就是堅持行民主自由制。
袁弓夷疼錫孫女,他也會把家訓傳給下一代,「我對個孫同對個仔都冇分別,佢哋都係我啲後代,我從來唔教個仔要點,佢相信乜嘢,鍾意點樣就點樣。我哋以前喺上海,原本生活唔錯,但經歷文革,慶幸我同爸爸、家姐一早嚟咗香港,剩番妹妹同媽媽留低,佢哋俾紅衞兵拉下鄉,佢哋俾人搶晒家產,我哋要不斷寄錢返去畀佢哋。我媽媽勞改坐監20年,佢哋捱咗好多苦,遲咗20年先出嚟,呢啲事要講出嚟畀大家聽,係事實唔怕講。」就是這些過去,造就了袁弓夷無懼一切站出來捍衞自由。
-----------------------------
袁彌明父女過去一年,不時上街表達訴求。(資料圖片)
袁弓夷三代同堂,他對子孫堅持灌輸民主自由思想。(FB圖片)