入行23年的周家怡最近憑電影《無雙》「何蔚藍」一角，首度獲提名香港電影金像獎最佳女配角，細數家怡的入行經過，可以說經歷過無數高高低低，一度令她迷失了自己，幸好最後走出這死胡同，其後因為《無雙》的關係，令她學懂放下過去，捉緊眼前一切，為將來行更遠的路。

日前家怡在尖沙嘴接受《蘋果》訪問，對於自己獲提名女配角，她笑說：「真係好多嘢都估唔到，完全冇諗過，而家成日同自己講，唔好諗咁多，好好享受呢個時間，最緊要嗰日着靚啲，不過點都係開心，今次係一支好強嘅強心針，以前唔會諗咁多，只係諗要做好啲戲，亦唔會知道有幾多人可以認同自己，但係喺呢個選舉，原來好多同行人都覺得我ok，之後見多咗其他導演，接觸多咗又感受到佢哋好錫我，令我覺得條路可以行遠啲，仲可以做好多好嘅角色。」

家怡當年離開無綫轉投港視，可惜因為港視不獲續牌，不單作品放映遙遙無期，甚至連工作亦大受影響，回望這日子，家怡說：「其實呢幾年對我嚟講係有高有低，有起有跌，喺我人生經歷裏面係加咗好多嘢，呢個經歷令我嘅演技多咗好多，一個演員喺唔同嘅情況、心理同心態係可以影響演戲方式。以前離開TVB去港視嘅時候，最初會擔心可唔可以做女主角？會唔會孭得起？到咗拍《導火新聞線》，叫做試過做女主角，但係戲未出街，即係冇人睇過，唔知道係發生乜嘢事，只係自己有呢份感覺，嗰一刻內心其實幾難受，係需要自我調整，係亂打亂撞咁去調節。」她續說：「不過當劇集出咗街，又停咗一段時間，嗰個信心會受到打擊；之後到咗再有嘢拍，你又會用一個質疑嘅方法去做，又會擔心唔知有冇下一套，因為呢個唔專心，係會影響做戲。」

問到家怡如何行過這人生低潮？她說：「其實成個過程好快，只係兩、三日嘅事，仲有諗過轉行，但係都同自己講，點都要拍埋啲戲先，到時再諗，最多返去讀番書，之後又casting緊另一套戲，但係唔使點做嘢，只係行行企企，變咗我可以好專心睇佢哋拍嘢，睇番又覺得好正，所以好快就投入番，一投入嘅時候，又會去番當刻嗰個moment，原來活在當下，係可以令你放開唔開心嘅嘢，只係會不如做好呢一刻嘅嘢，抱住一個好珍惜、感恩嘅心。」

在訪問期間，家怡多次提到活在當下，她說：「點解成日話要活在當下，去到今日，經歷咗咁多嘢嘅時候，好多嘢真係唔好諗喇，不如好好享受去做戲，有啲經歷係必需要經過，有起有跌對我嚟講，係袋咗錢入我個袋，對我之後做戲，點樣行條路，點樣面對我嘅工作同人生，係一個好好嘅經歷。」笑稱她有阿Q精神，她笑說：「都係㗎，但係真係要好多謝屋企人畀我去任性，唔使我去養家，呢個真係已經幫咗好大忙，真係好幸運，我嘅屋企人唔係好有錢，但係都唔需要額外去擔心佢哋，呢樣嘢係優勢。」

她還說：「我而家成日提自己，過去嘅唔開心事情，係已經發生咗，我今日坐喺呢度，即係話呢件事係發生咗，我係冇辦法去改變，如果呢一刻仲諗住呢件事，只係整蠱我自己。將來嘅問題，不如留番將來先解決，呢一刻諗嚟都冇意思，我相信好多嘢有佢嘅主宰，條路帶到你去邊，咪跟住佢行，可能有一日個天同我講，話我唔適合做呢行，我就會走，不過做呢行唔開心真係唔好做，因為真係冇人保證付出幾多，收入有幾多，連自己做都唔開心，真係好唔值得去做，真係要錫自己。」

最佳女配角入圍名單：
黃 璐《G殺》
蔣璐霞《紅海行動》
余香凝《逆流大叔》
周家怡《無雙》
惠英紅《翠絲》

撰文：何慧斯
場地提供：南小館(The ONE)
服裝：I.T. Official
化妝：Herman Ng
髮型: Vincent Yeung

-----------------------------
追蹤真相 守護公義
免費訂閱支持蘋果 4月10日無阻盡覽
https://hk.adai.ly/PMtkKQIUBV
-----------------------------
動腦Q金像獎周
4月8日-12日 10:30PM
Let’s Q the money！Action！
https://hk.adai.ly/zpCd06PPwV