梁洛施（Isabella）同小小超李澤楷分手之後，佢復出娛樂圈拍戲已經有一段日子，之不過佢接戲嘅準則都幾奇怪，早排走去客串《十二金鴨》一角，最近《寒戰2》搵佢演出一個大法官（周潤發演）嘅助手角色，聽聞戲份都幾重，又有發揮，但Isabella就推咗，結果俾JaniceMan（文詠珊）冷手執個熱煎堆，其實Isabella都算係JM福星，之前陳果部《那夜凌晨，我坐上了旺角開往大埔的紅van》都係因為佢推咗，導演先搵咗JM做。

Isabella推呢部戲，據知係因為佢三個仔今年9月開學，同部戲撞晒期，而佢同小小超有協議，做嘢都要以三個仔為優先，所以冇辦法唔推。佢經理人Roy話：「電影公司係有接洽過，但因為檔期配合唔到，Isabella有自己私事處理，佢都覺好可惜。」

其實JM唔使介意係執二攤，最緊要係拍到好戲，睇吓井柏然，當初安樂電影老闆江志強，因為柯震東被內地封殺，周圍搵當紅演員代柯震東重拍《捉妖記》，但所有當紅嘅林更新、吳亦凡、阮經天同文章，都以各種理由推咗，咁樣機會先落到井柏然手，0依家部戲喺內地分分鐘有機會收20億元人民幣票房，井柏然0依家有好多人搵佢拍戲，推呢部戲嘅演員0依家咪呻笨囉！

另外，聽說彭于晏人紅就大頭症發作，安樂電影向佢攞檔期演出《寒戰2》，但佢遲遲畀唔出足夠檔期，令安樂同兩位導演頗為不滿，正考戲將佢飛出局，就傳聞求證導演陸劍青，佢話：「冇換到，期嘅嘢可以度嘅，佢啲期係難度啲，人紅。佢嘅戲份（彭于晏）都唔少㗎。」同時佢又承認梁洛施角色係換咗JM演出。