【本報訊】OL、學生、社運人，齊齊響應警方號召，發起「集擊」行動。警方就7.1大遊行向民陣發出的不反對通知書，以附帶條件警告參加者不能玩樂器，禁令惹起社會譁然，他們實行公民抗命，準備7.1當天集體敲擊示威，昨晚還一起集訓，響戰鼓，迎7.1。
志願組織自然活化合作社舉辦「社運戰鼓速成班」，昨晚在牛頭角工廈練習，吸引數十人參加。負責人年華說，曾偉雄上任警務處長後，對遊行示威的限制比前更多更緊，「其實遊行示威玩樂器唔係新鮮事，今次警方做法，反而可以畀多啲人思考，我哋嘅表達自由經常受到干預」。

「喺外國係指定動作」

年華質疑警方的「禁樂」行動是個陰謀：「可能係一啲計仔，轉移視線，令傳媒用咗好多篇幅報道呢樣嘢，而忽略咗7.1遊行嘅真正訴求。」
無論如何，自活社7.1當日會公民抗命，街照上、鼓照打，還希望更多人帶樂器上街，邊行邊奏，令遊行更有氣勢。
「遊行加入樂器係一種趨勢，行咁耐嗌足咁耐，根本唔可能，一定要有音樂。」另一負責人梁穎禮說，速成班並非專為7.1遊行而設，他期望以後的示威遊行，參加者都懂得用樂器搞氣氛：「唔同氣氛要打唔同嘅拍子，例如示威者同警方談判緊，要打得慢啲；要衝擊警方防線，就要打得急啲！」
梁穎禮在2005年韓農反世貿示威中已打戰鼓，多年來都帶着樂器上街，「遊行玩樂器係好平常嘅事，喺外國更加係指定動作，香港政府成日話香港係國際都市，少少嘢都容忍唔到」。
敲擊樂常用於遊行示威，因為夠簡單，參加者容易掌握，也容易配合遊行口號。昨晚戰鼓速成班的參加者多為80後、90後青年，來自社會不同範疇。
學生楊小姐帶了一個小鼓來上堂，她對警方禁止奏樂感到驚訝及無奈：「我諗警方咁做係出於恐懼。」
Charlie是OL，專程為了今次7.1遊行買個搖鼓，「我絕對係公民抗命，對警方極度不滿、極度厭惡。其實我真係怕俾警察拉o架，呢個警隊已經唔理性，只係識聽order做嘢。不過我條氣唔順，冇理由做順民o架嘛」。