謝玲玲61歲仍然不失優雅，167cm高，體重多年來都保持在120磅左右，她笑言每日上磅，不容許自己肥多過3磅，全靠自律做運動，當中每個星期必做兩次Pilates、gym，到40多歲學拉丁社交舞，認真到要搵參加黑池級數的老師上堂，身形多年來keep得令人羨慕：「我好鍾意學嘢，細嗰時候我學芭蕾舞，所以有少少呢方面感覺，40幾歲開始難pickup，可能有少少對藝術比較易啲上手，要求高，搵老師畫畫跳舞都希望學得最好，因為時間好寶貴，所以學嘢時候要認真啲。」

謝玲玲透露因姐姐愛跳拉丁舞，故千禧年開始跟去跳，一跳上癮，更找來黑池世界級前四名老師、世界拉丁舞冠軍Troels Bager學舞7年，上星期更與另一位來自南非、贏得黑池比賽的老師Darren Hammond為跳舞學校做表演嘉賓，她表示：「學得認真，學了10幾年，由基本堂開始，要有目標來練習，當一個全身運動，練習已好有運動量，練一陣已會流晒汗，係一個好健康開心嘅運動。」

結果一跳就跳足10幾年，謝玲玲表示：「一星期會跳兩、三次，大前年香港乳癌資料庫搵我慈善表演，為佢哋籌咗100萬。跳舞令到身形保持到，動作靈活，好似舊年我跟仔女去滑雪，我好多年前整親無滑過，舊年滑番，最開心係10幾年前既滑雪衫都啱著。」

另外，在養生習慣上，謝玲玲一樣自律，多年不變，每日睡8小時，從不午睡，飲食均衡，每天早上上磅，若重了即做運動及注重飲食：「如果上磅重了兩、三磅即刻減係易過重咗十幾磅先減。」謝玲玲自言乜都食，無須戒口：「尤其鍾意食甜品、朱古力，如果發現重咗，就會自律唔可以盡情食，食少點甜品，好似我好鍾意食榴槤，知道一食就肥，盡量少食，但奶奶都好鍾意食，就間中破戒，同埋我都係正常一日三餐，不過唔食宵夜，如果唔外出食飯應酬，喺屋企就6點幾食飯。」

人生閱歷豐富的謝玲玲，幾年前重返校園做學生，在大陸讀長江商學院的CEO課程，第一期的畢業生是阿里爸爸的馬雲，而她是第十期：「其實有個故仔，幾年前我希望我大仔讀碩士，佢大學畢業返嚟要跟爺爺做嘢，後尾佢考到美國西北大學Kellogg EMBA，我就問院長我可唔可以申請去讀，最後佢收咗我，有個機會去到世界唔同國家學院學習，舊年畢咗業，同學都係上市公司主席，o依家大仔做咗我學弟。」問到為何有興趣讀書，她表示：「呢個係商學院，畀你瞭解o依家世界各國家唔同發明、新科技、人工智能，我都想同仔女一樣成長。」

採訪：梁錦雯
攝錄：葉君海
攝影：林德雄
場地：Beefbar

【閃耀人生女人心－謝玲玲(1)】返學有特權 婉君表妹的童星歲月
http://bit.ly/2pnLmVU
【閃耀人生女人心－謝玲玲(2)】忽然變荷李活Cult片女星 被加全裸戲
http://bit.ly/2pn7CQu
【閃耀人生女人心－謝玲玲(3)】23歲入豪門 永遠新抱感激奶奶一路幫助
http://bit.ly/2u9gJtg
【閃耀人生女人心－謝玲玲(4)】五子女全日受補習老師監督 虎媽：一定要碩士
https://bit.ly/2ucpLWq
【閃耀人生女人心－謝玲玲(5)】同林建岳離婚 謝玲玲傷心一年幸有奶奶撐
https://bit.ly/2HXiDPk
【閃耀人生女人心－謝玲玲(6)】畫畫為自娛 畫出彩色人生
https://bit.ly/2pDVHNE