今年42歲楊思琦在2011年被爆與李泳豪分手後，火速暗交前跳水隊隊員吳帥兼懷有兩個多月身孕，令思琦形象直插低谷，更被標籤為「貪慕虛榮」，但兩人最終分手收場。2012年她在美國誕下女兒Krystal，當時有傳經手人正是吳帥，但她堅持封嘴不談。去年10月突然爆出思琦再度懷孕兼已經與圈外男友註冊，但「有名有份」的思琦依然絕口不提老公的身份，連身邊的朋友均異口同聲表示未有見過，結果有人更質疑這個人是否存在，不排除是個虛疑人物！

日前思琦在銅鑼灣接受《蘋果》專訪，對於外界對她另一半的揣測，思琦笑說：「有存在㗎，我覺得感情係兩個人嘅事，唔使擺晒出嚟畀人睇，最緊要係兩個人舒服咪得，而且佢又唔係圈中人，未必會習慣呢個生活模式，如果有人追訪佢，佢都會有壓力，呢個唔係我嘅意思，係佢提出嘅要求，所以我都尊重佢嘅意見。」

當日思琦誕下兒子Kody後，一直未有透露兒子的中文名，有指囝囝是跟她姓楊，思琦擰一擰頭說：「其實我一直都冇講到呢個問題，唔係呀，我一直都冇答過。」「經手人」的謎團未解開，大家當然很好奇，思琦的感情生活多次成為話題，提到這段突如其來的戀情，思琦只說：「我都唔知自己點解咁曲折，人哋嗰啲好順，但係我自己遇到好多唔同嘅嘢，有高有低。不過我又唔係話灰心，只不過冇積極去搵一個啱自己嘅人， 之前太忙喇，唔會諗究竟要一個乜嘢對象嘅人，咁啱喺嗰段時間諗緊自己嘅愛情，點知佢就出現。」

相識經過、求婚過程當然是絕口不提，反而提到一對兒女，思琦的狀態明顯鬆懈，因為疫情關係，工作難免受到影響：「呢段時間同以往好唔同，但係唔止藝人，係全球化嘅問題，我多咗時間喺屋企照顧仔女，湊大女嗰陣，喺佢兩個月大之後不停工作，錯過咗唔少成長嘅片段，而家全力湊細佬，感覺真係好唔同，同8年前比，真係好攰、好吃力，消耗咗好多energy。」問她會否對女兒有點愧疚？她說：「我而家一次過償還畀佢，成日喺佢身邊，佢而家覺得我係煩音，『常哦』。」問到囡囡與老公相處情況，她只是簡單地說：「佢冇分彼此，相處好開心，一樣係好錫個女，個女亦都期待已久，一日爸爸爸爸，佢覺得自己終於有個爸爸。」

雖然思琦已經做了人妻，但她坦言自己心中仍然有一團火，最近為香港開電視的外購日劇《夏空》唱中文版主題曲《仲夏陽光》：「佢一直好支持我，不過佢都有講過，如果有時間唞就可以唞吓，佢都知我哋呢行，忙起上嚟係冇時間休息，成日都提醒我，當然我而家都好享受，有一段穩定嘅愛情關係，可以令到我正常去思考，情緒上都會穩定，佢喺屋企同工作上都畀到意見我，我會好好珍惜。」她續說：「但係我個心仲有一團火，真係好鍾意工作，繼續做吓自己想做嘅嘢，我係嗰啲一停落嚟覺得有蟻咬，一定要做嘢先安樂，所以我會當係一種訓練，睇吓可唔可以兼晒兩樣嘢，迫出啲能力，喺家庭同事業之間互相平衡。」

撰文：唐琛悠
攝影：沈健程
場地：Lounge Hakuba
服裝：Per Me
髮型：Chris Cheng( IL COLPO)
化妝：jessicachan_makeup

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！