現年29歲嘅韓劇《誘惑》女星朴河宣，今年1月跟37歲男星柳秀榮結婚，並於4月宣佈懷孕消息，同時喺上月23號晚誕下B女，兩人升呢做父母。新手老竇柳秀榮早前忙完劇集《爸爸好奇怪》嘅拍攝，終於多返啲時間陪下老婆同愛女，柳秀榮今日透過Instagram上載囡囡隻腳仔，相當可愛，柳秀榮更留言寫道：「我哋已經見咗10日喇，依家冇咗你就生存唔到，我愛你。」父愛爆棚。

另外，KBS綜藝節目《演藝家仲介》今日公開咗柳秀榮日前嘅受訪片段，節目組得知佢榮升做爸爸，送上一件印有「爸爸」字眼嘅T恤，令柳秀榮即時諗起囡囡而笑到見牙唔見眼，認真幸福。柳秀榮當日提到：「拍完《爸爸好奇怪》最後一場戲，就收到囡囡出世嘅喜訊，估唔到係咁幸福嘅事，早知係咁我應該早啲結婚。」

至於朴河宣近日忙於宣傳新片《青年警察》，受訪時佢就大讚老公柳秀榮好幫得手，除咗會分擔家務亦會下廚煮飯，不過朴河宣亦體貼地表示：「自己一個人做太辛苦，所以我同老公會輪流煮飯。」言語間相當甜蜜。