練馬師沈集成勝在殺手多，調兵遣將靈活，當中羅理雅、莫雷拉、潘頓被喻為其馬房主攻手，巴度則屬沈廐冷殺手。這晚（15日）係巴度此行最後一次跑谷草夜馬，事關佢本月最後兩個賽日停賽，變成跑罷今晚及周日（19日）沙田日馬便會離職。

貴為沈廐冷殺手，呢位法國騎師這晚又幫支持者沈集成爆冷贏馬，巴度於第三場三班一哩夥拍「琪麟穎」，早段居後，對面直路採取中段加速走甩戰略帶出，就此奠定勝局贏1.75馬位，為自己呢匹新座騎打開轉投沈集成馬房後齋缽，單Win及組合獨贏A2分別派157及37元，人馬表現獲幕後予以肯定。

巴度來港至今六度贏馬，其中五場來自沈集成馬房，包括上周三（8日）晚為沈集成另一駒「大英雄」爆冷開齋，變成個人刑滿復出以來，兩次跑谷草夜賽都有馬贏。

沈集成指出「琪麟穎」鍾意諗嘢，一出頭就不願跑，所以今場嘗試給牠新鮮感，排外檔轉彎中段即發力，令馬兒有不同感覺，成功刺激到牠，巴度亦發揮出色。而馬主表示很開心，等了這場頭馬很久，當初見馬兒連番欠表現，曾懷疑牠的實力，沈集成花了不少心機打理，巴度亦完全依照策騎指示，騎練均值得一讚。

沈集成左右開弓，在沙田及快活谷雙線贏馬之下，馬房踏入雞年連贏六個賽日共取八Win未斷纜，氣勢之盛拍得住榜首神人蔡約翰。

第三場前四名有冷有熱，二至四名分別為後備補出馬「辣得很」、「嘉應之友」及「安荃」，四重彩派七萬八千幾。