近日喺油麻地果欄出沒偷生果嘅四眼賊哥，據中招欄商岑生話，「佢着成咁，有晒預謀，肯定做過功課，俾佢呃晒。」單偷生果案喺上星期六清晨零時發生，至少兩個欄商失竊。

動作純熟　踎低就攞

據岑生個同事黃小姐話，當日凌晨2點返工，發現舖頭有生果唔見咗，翻睇閉路電視見到有個着住恤衫西褲，戴住金絲眼鏡嘅賊仔喺附近徘徊，仲趁冇人彎腰，攞走一箱24個，價值160蚊嘅肯亞牛油果。
差唔多同一時間，隔籬欄商亦被偷走一箱韓國入口，6個裝賣180蚊嘅韓國黃金瓜。欄商睇番閉路電視，發現同一個賊仔大膽到踎低就攞走箱生果，全程唔到10秒。黃小姐睇到片段大鬧：「佢動作好純熟，好快手，簡直係斯文敗類！」
九龍果菜同業商會理事長張志祥話，近年有欄商發展零售生意，令到多咗人出入果欄，唔排除賊仔睇中果欄凌晨開工、日頭收工嘅特點，揀日頭犯案。佢話現時欄商有夾份請看更由晏晝1點到凌晨1點當值，但提醒同業自己小心。