電影《功夫熊貓3》噚晚喺九龍灣德福舉行首映禮,不少亞視舊將獲邀出席,佢哋明顯比起喺亞視做嗰時有更多機會同曝光率喎!劉錫賢之前話過亞視被欠薪員工組織咗個聯盟透過法援申請亞視清盤令,咁梗係想追番啲糧喇!蔡國威就啱啱返香港,佢話:「員工方面唔清楚,不過,藝人就17/3會同德勤傾,聽到法援受理係非常開心,o依家好似打機,打大佬,越多人打就越好。」
聽聞亞視執笠前仲係諗住搞亞姐?金牌司儀蔡國威又會唔會捱下義氣先?威仔斬釘截鐵話:「吓,我諗佢哋唔會搵我,自己呢幾日唔係香港,唔好搞我,真係唔想,想有個了斷,唔好再有關係,想抽身有個新形象。」
咁係咪睇好亞姐搞得成先?威仔就唔係咁睇話:「我覺得搞唔成,如果搞得成祝佢哋順利,我覺得好難,唔係一個普通騷,有足夠佳麗,又要機票食住十幾日,好難。」
筱靖聽到話亞視仲想搞亞姐,佢反應好大咁話:「吓,又嚟,我之睇到話四位數字后冠,四位數字搵我贊助我喇!我贊助得起。」筱靖又係亞姐出身,咁有冇搵佢呢?佢話:「冇搵我,我講嘢成日踏中佢哋神經,反而叫同事四月一號佢哋關門返去懷緬一下,4月8號A記同學會,見番舊同事,每年都會好盛,今年意義重大,愛之深恨之切,一定會悲喜交雜。」