今日一班大專生喺荃灣參與《FaceBubbleCup大專泡泡盃》比賽,林敏驄、盧頌之(DaDa)同趙勁皓(King)等擔任明星嘉賓落場打氣,而組合天堂鳥擔任表演嘉賓。
DaDa同男友趙勁皓落場時,竟被男友撞至倒地,為咗今次比賽,阿King專登食肥啲等自己力量大啲,而DaDa笑說:「我之前差啲練到馬甲線,不過中秋食得太多嘢肥咗,唯有要再操番。」
阿King近日都係主理健身房工作,以及準備喺上環開第三間餐廳,DaDa亦有落健身房幫男友手,問佢係咪以老闆娘身份幫手?阿King話:「我出300蚊一日請佢,仲話要畀多80蚊一日當加人工。」
問阿King何時將DaDa升格做老闆娘先?佢笑說:「等我事業有成先,今年都有睇樓,但搵唔啱。」DaDa笑住話:「佢睇樓關我咩事。」
鬼馬林敏驄似乎唔知嚟仲乜,講到會同班靚女撞嚟撞去,佢就望住DaDa話:「呢個過咗期,過咗少女期。」最近開始忙住寫新歌,佢指以前嘅《冇有線電台》專輯,最近喺網上二手區被熱賣,價錢仲炒到好貴,佢話:「我想逐隻歌出番,等可以賺多啲,當時都有十幾廿隻。」