【新增動新聞】
「女水神」終於有對手？周六喺匈牙利舉行嘅世界游泳錦標賽，美國泳手列迪姬喺女子800米自由泳決賽游出8分12秒68大熱勝出，實現3連冠之餘兼取得今屆第5金，歷屆14金更繼續刷新個人保持嘅女泳手最多獎牌紀錄。不過，佢嘅優勢唔似去年里約奧運贏足半個塘咁「OP」，皆因15歲中國新星李冰潔全程緊隨其後，最終以新亞洲紀錄8分15秒46力壓另一美國泳手莉亞史密芙（Leah Smith）摘銀！雖然要論斷李冰潔有力威脅列迪姬地位言之尚早，但年僅15歲就有如此驚人表現，絕對值得期待，佢賽後表示：「我冇諗過游到咁快，自己仲有傷病，有呢個成績我好滿意。」

同日亦有兩位泳手表現出眾，其中瑞典「蝶后」絲祖唐（Sarah Sjöström）喺女子50米蝶泳決賽游出24秒60奪金，又喺50米自由泳複賽造出新世界紀錄23秒67！至於美國泳手迪素（Caeleb Remel Dressel）更係一日連奪3金，創下世錦賽紀錄，包括男子100米蝶泳、50米自由泳同4x100米男女混合自由泳接力，其中接力更以3分19秒60造出新世績！女子200米蛙泳就由澳洲泳手施邦（Emily Seebohm）力壓主場最愛賀素（Katinka Hosszu）封后。

其餘項目方面，克羅地亞喺男子水球決賽以8:6擊敗主隊匈牙利稱王，女子20米高台跳水就由澳洲嘅伊芙蘭（Rhiannan Iffland）稱后，成為第一位澳洲選手造出此成就。