當年今日

  老董要親筆簽名回信 - 李八方

蘋果日報 2002/01/05 00:00


董特首連日嚟晚晚見選委,八方睇大家排排企影相都開始發悶,但係講到會面內容,就日日都有驚喜。好似噚日咁,港九區議會選委席間提出咗一個精闢意見,叫老董日後覆信畀市民一定要親筆簽名,唔好搵人代函,因為咁先有誠意喎。老董既然要改善公關手法,呢點梗係會盡量考慮啦,好彩只係叫佢親自簽名,如果話要親筆題字,最好寫晒成封信,都真係唔知點算!
講開公關,八方都唔知老董係咪真係有誠意搞好形象。好似呢幾日排排企同選委影相咁,記者入得去影相,自然會問問題啦,但係競選辦嘅大哥大姐竟然怪責記者,話佢哋唔應該發問,反而老董仍大方面對鏡頭作答。唔怪得之有行家話,江主席影相都問得,唔通老董威過江主席?


E-mail:[email protected]