地鐵同九鐵合併咗之後,唔少路線都有酌量咁減吓價,算係換嚟部份市民嘅掌聲。但係小妹就覺得,如果港鐵取消埋一啲鮮為人知嘅收費,就會更加得到大眾歡心。
事緣小妹早排搭港鐵,搵嚟搵去都搵唔到張八達通卡,估計都係太過專心行街shopping,跌咗張卡。張卡仲有幾十蚊,跌咗都冇辦法,惟有去買番張新卡,唔通要次次買飛過閘咁麻煩咩。
點知幾日之後,小妹喺個手袋搵番張舊卡。原來係自己大頭蝦,將舊卡放埋一邊,咪即時攞張新卡去港鐵報銷囉!港鐵嘅票務員退番啲按金同餘額畀我,小妹發現好似找少咗錢,咪返轉頭問清楚票務員。佢先至解釋話,乘客退回一張用唔夠三個月嘅八達通卡,係要扣7蚊手續費。
無端端被人扣錢好唔抵,小妹咪即時話唔退住,等夠期先至退。小妹之後搵港鐵啲公關大姐問吓,佢證實退八達通新卡會收手續費,但按程序,職員退卡嗰陣,會首先講畀乘客知。吓!冇噃,真係口同鼻拗。奉勸各位退新卡要留神,咪被人扣咗錢都唔知。
逢周一至周四刊出