麥當娜完場，今日單拖睇騷嘅郭藹明被問老公劉青雲點解冇嚟，佢就話老公要做嘢所以冇嚟。

杜德偉就拖老婆Ice出嚟，仲有舊愛吳君如，Ice就叫記者唔好影佢，要影就影佢老公同吳君如，所以一對舊情人就大方合照，吳君如大讚個騷好好睇，但俾麥當娜掟出嘅花球掟中條頸，仲話好大力。

邵美琪就讚個騷好精彩，仲話喺君如手上面拎咗啲花球嘅花，笑言會好lucky。李玟就素顏戴帽孖老公睇騷，佢話話今日係特登由長沙飛返嚟睇:「瞓得3個鐘，好好睇，睇到好開心，雖然遲咗少少入場，都睇到大半，總之就好開心，partpart都正到爆，每一part都咁鐘意，對自己做騷都好有啟發。」

今晚娜姐唱《UnapologeticBitch》就邀請一位叫Evelyn嘅粉絲上台，娜姐好欣賞佢套衫，又話佢跳舞時扮雞拍翼好過癮，即時同佢跳多次。娜姐請佢食蕉時，問佢係咪成日見到蕉型時，Evelyn話日日都見到，娜姐及全場即時起哄。

呢位幸運粉絲Evelyn一出場外大呼仲係好緊張，個肚仲痛緊，佢話台上娜姐問佢件衫係咪自己設計，自己好緊張答咗「NO」，但件衫係網上買嘅澳洲品牌，娜姐又問佢香港係係咪比較怕羞，Evelyn話:「係，不過都比你熱情溶咗。」

鄭裕玲亦讚個騷超正，鐘意佢飛來飛去嗰part，自己鐘意嘅歌成晚都有聽到，所以好滿意，而蔡一傑就大讚娜姐今晚狀態比前一晚更好，仲話好唔夠喉會去澳門再睇。

而娜姐喺凌晨12點20分亦返咗酒店，仲Update埋IG，真係好快手!