開賽前三個半鐘先同澳門踢完友賽嘅流浪,今場踢得好被動。20分鐘,飛馬中堅艾華度接應利馬角球頂入領先1:0;流浪喺39分鐘由許嘉樂出個靚波畀卓耀國頂入,呢個亦係阿國近五場第五個入波。下半場飛馬狂攻都入唔到波,最終兩隊踢成1:1,流浪同東方出線,飛馬就出局。
賽後陳婉婷話:「今場以平常心去睇,始終自己改變唔到啲咩。兩隊踢得好積極,係一場好波。」飛馬教練李志堅就指:「球隊踢得進取、好積極,但把握唔到。」流浪喺盃賽嘅成績好過港超,主帥列卡度就唔覺得係因為球隊踢得好啲,只係因為好運。至於同日另一場A組分組賽就係「例行公事」,傑志大勝夢想駿其3:0。