「乜嘢都可以輸，信心唔可以輸。」呢句振奮人心嘅說話，係出自N年前三色台熱爆劇《天地豪情》中，羅嘉良飾演嘅大頭文口中，今日八方將佢送畀正在巴黎出戰「無家者世界盃2011」嘅港隊成員，佢哋首仗以3比5敗給納米尼亞，能夠喺非洲勁旅腳下射破3球龍門，已係歷年最佳賽果。

社區協會組織幹事吳衞東同八方講，以往遇上非洲球隊多數食蛋收場，今次可以有3球進賬，除咗球員鬥心超強，絕無怯場之外，仲要多謝基督教勵行會安排一批在港嘅非洲難民，同港隊踢三場友誼賽，加強體能同對抗性。其實比賽輸贏係次要，最重要畀無家者知道，「要本住學習、唔放棄嘅精神，建立信心」。今次唔少港人自費到巴黎打氣，除長毛外，仲有傑志前隊長兼現任教官梁志榮等，港人想一齊打氣，可登入網頁： http://www.homelessworldcup.org/paris-2011/video睇現場直播。