皇家馬德里周日就會喺美國上演嘅國冠盃火併曼聯，上演新球季首場熱身賽，但葡萄牙球星基斯坦奴朗拿度（C朗）就繼續嘆世界，周六馬不停蹄由新加坡轉戰上海，仲喺上海上港同廣州恒大踢成2:2嘅中超大戰擔任開球禮嘉賓，被主持問到今年係上海145年來最熱夏天感覺點樣，C朗不失自信本色：「呢日係最熱一日，因為我嚟到呢度。」佢又用普通話同球迷打招呼，賽前亦同前葡萄牙國家隊教練史高拉利聚首，互相擁抱。

近排歐洲球壇焦點落晒喺巴塞隆拿球星尼馬身上，世人彷彿集體遺忘咗C朗早前亦有鬧離隊傳聞，但事件至今冇晒聲氣，唔通又係C朗續約加薪前嘅鬧劇？施丹出席國冠盃賽前記者會時，就好有信心C朗今季唔會走人：「雖然有好多關於C朗嘅傳聞，話佢渴望離隊，但我只相信一件事──當我同佢傾偈時，佢表現相當放鬆。佢目前仍然度緊假，將會喺8月5日歸隊，我亦認為佢喺未來兩至三季合約期依然會留喺皇馬。」另外，施丹同時確認巴西右閘丹尼路雷斯將會離隊，據報佢即將以2,650萬鎊（約2.65億港元）轉投英超曼城。