神隱咗14年嘅娃娃舜黃宏舜最近蒲番頭，頻頻幫電影《猛龍特囧》宣傳，前晚佢仲去埋電影喺旺角舉行嘅慶功宴，同場仲有鄭中基、雨僑同胡耀輝等等，講到明嚟食飯支持吓嘅娃娃舜，問到佢同蕭定一有冇合作？佢笑笑口話無可奉告，仲話：「如果有機會都試吓拍戲，睇吓啲導演畀乜嘢機會，喜劇都OK。」之後突然間側邊有個唔知係助手定朋友嘅人，話阿舜心情麻麻地，因為佢老婆就嚟生，阿舜唞咗一大啖氣就話：「老婆入咗院已經有10日，日日都有去探佢，預產期係10號，唔緊張唔得，因為BB仔有啲打橫，醫生話如果9號前未掉頭就要開刀。」阿舜仲話個BB係女仔，名都改咗，遲啲會努力賺錢同多啲陪老婆，當係獎勵佢。

鄭中基唔怕鉛水

最近好多學校都有鉛水問題，鄭中基話冇得擔心咁多，問佢會唔會幫個女準備飯盒同帶水？佢話：「佢學校就真係有點心嘅，點心就冇乜問題，水就會幫佢準備，食點心啫，又唔係食嚿鉛。」之後講到部戲上咗幾日收400萬，鄭中基話唔知，不過佢話胡耀輝嗰陣拍緊已經講諗咗第2集故事大綱，如果真係拍續集都會繼續做。
撰文：馮仁昭