同龍王接吻 Hea住浸最大沖浪泉
聚龍灣,清遠市佛岡縣一個剛開幕大型溫泉度假村。名字背後有古講:好耐之前,四海龍王去完王母娘娘嘅蟠桃大會,駕雲返歸見湯塘山山巒起伏,發酒瘟瞓覺流口水,口水(龍涎水)滲落地底形成𠵱家嘅溫泉區──咪住,嚟聚龍灣浸全國最大嘅沖浪溫泉,咪即係間接同龍王打茄輪?係呀,話埋你知有40幾個露天溫泉,有排你打呀……
記者:蘇振鵬 攝影:陳陶鈞
模特兒:Natalie、Ranee(STAGEMODELS)
鳴謝:關鍵旅行社有限公司、
深圳巿旅遊(集團)公司
■兒童池有水槍、蹺蹺板等,同細路爭嘢玩一樣有Fun。
■火龍洞,加入珍貴中藥,有消熱解毒功效,不過現場播放劉華歌曲,幾九唔搭八吓。
■冰震池,浸完幾十度熱水,再浸10℃冰水,即時毛管戙晒至醒神。
■酒仙泉,離遠已經聞到大陣酒味,會唔會浸浸吓醉咗?
■深水SPA池,攤喺度浸歎到痹,有放鬆神經、促進血液循環功效。
新開嘅聚龍灣天然溫泉度假村面積27萬多平方米,喺清遠,呢類溫泉度假村多到唔恨,所以噱頭一定唔少得。據稱,呢度有全國最大達2,500平方米嘅沖浪溫泉、兒童專用嬉水溫泉、大型水上表演,最勁係有40幾個特色露天溫泉池。浸得晒,代表你已經同龍王間接打茄輪40幾次,不過唔使怕,龍涎水泉眼溫度高達82℃,仲含氡、鈣、鉀、鈉、鎂等20多種放射性微量元素,前者更有改善哮喘、便秘、失眠、神經衰弱等等等等病症嘅功效,不過最重要係──舒服!由深圳熬3粒鐘過嚟喎大佬,幾大都要浸到甩皮甩皮再甩皮啦。
■度假村有300多間客房同20幾棟別墅,每間客房都有小型桑拿室,享受極之方便。
浸完溫泉,無甩皮,不過肚仔餓。講到食,呢度係清遠,走地雞走唔甩。離度假村15分鐘車程嘅佛岡縣正係食雞好地方,講真,佛岡縣買手信嘅地方唔多,但食肆就大把,推介酒樓「南海食街」,清遠雞、客家菜好有水準。酒樓之外,夜市一樣咁熱鬧,成條街都係營業到半夜嘅小食檔、大牌檔,為食?無有怕,驚你花多眼亂心大心細唔知食乜好咋。
■佛岡縣多小販檔,燒韭菜(¥0.5)加咗七味粉,串燒勁惹味。
■推介佛岡縣上三角落客區大牌檔「洪陽沙煲粥」,鐵板豬腸豬肚(¥10)最豬腸最薄部份,零脂肪超甘香;海鮮砂煲粥(¥20)餡靚夠大煲,正。(地址:佛岡縣環城中路590號)
■推介南海食街嘅鹹蛋黃釀叉燒桂花札(¥23)、客家釀浮萍(¥18)、金籠蒸雞(¥60)。清遠人傳統食法只食5成熟雞,點黑醋或白醋食,既能殺菌亦可以食到雞嘅嫩滑。(地址:佛岡縣農副產品批發巿場內)
又浸又食,仲欠郁喎!度假村附近正正有個觀音山,可以畀大家舒展筋骨。觀音山度度都有,香港都有個畀香灼璣霸佔咗嘅觀音山,但清遠觀音山海拔高1,288米,係冠名觀音山之中最高嘅,有朵叫廣東八大名山之一,山上面景點唔少,好似王山寺、龍宮、龍床、靈水湖等,仲有落差過百米嘅瀑布群,行完一趟最啱返去聚龍灣再浸過。
■觀音山係當地環境保護區,分東西兩道行山徑,以東道景點較多。
■行畢全程觀音山要4至5個鐘,可以讓你邊行山邊欣賞瀑布群。
聚龍灣天然溫泉度假村(86-7634632888)
地址:廣東清遠佛崗縣湯塘(京珠高速湯塘出入口左轉1公里106國道旁)
1.深圳乘地鐵在竹子林站下車,往福田汽車站轉乘往清遠巴士(約¥80)到清遠巿汽車站,再轉乘往湯塘巴士(約¥50),中途會經過聚龍灣度假村,全程約4小時。
2.度假村乘的士(約¥30)往佛岡縣,車程約20分鐘。
3.佛岡縣乘的士(約¥50)往觀音山,車程約25分鐘,問定的士司機電話號碼,方便電召的士回佛岡縣。
關鍵旅遊(23622022)
地址:紅磡馬頭圍道37號紅磡商業中心B座4樓
團費:2天團$399起,包入住聚龍灣天然溫泉度假村1晚,無限次任浸溫泉、旅遊車、三餐,行程包括英德英西峯林風景區、小布達拉宮「彭家祠」等;3天團$539起,包入住韶關新華或同級酒店1晚、聚龍灣天然溫泉度假村1晚,無限次任浸溫泉、旅遊車、三餐,行程包括奇石風景區、陽元石、乳源大峽谷、亡命高空表演等。
查詢:www.kwankin.com.hk