全新旅遊專頁，即like籽想旅行：https://fb.com/travel.appleseed



《星球大戰》遊戲《Star Wars Battlefront II》將在本星期推出，EA非常重視這年度重頭大作，早前更邀請全球傳媒到EA美國總部試玩這款遊戲的完全版。早前已公佈會加入以女兵Iden Versio視點進行的單人模式，今次就進一步公開其他遊戲模式，包括Arcade模式及多人模式。

Arcade模式其實都是單打玩法，可選擇Light Side及Dark Side作戰，每邊戰線有8個版圖，當中各設3個關卡難度；不過由於都是單打關係，可玩性只屬一般，主要讓玩家儲分解鎖新卡、新角色及熟習操作。遊戲設11個星球版圖及14位英雄角色，但最初可用的英雄角色好有限，需要靠儲分解鎖角色。至於多人模式就設有5種模式，類似搶旗玩法的Strike模式（8對8）及Deathmatch玩法的Blast模式（10打10），玩法熟口熟面，可說是「雞肋」。如果做慣兵仔，新加入的Heroes vs Villains模式（4對4）確實幾好玩，因為毋需解鎖就可揀選Light Side及Dark Side英雄角色困獸鬥，每隔一段時間系統就會指定一個角色作為目標，只要成功打低對方目標及保護己方目標都可得分，簡單又易玩。不過大家要明白星戰英雄角色能力都有高低，記者試玩時用上尤達大師、天行者以及黑武士，都相當屈機。

另一新加入的Starfighter Assault空戰模式，絕對值得一玩再玩。這個模式共用橫跨3個三部曲上的5個星際版圖，可以駕駛各類型戰機在太空場景作戰，當然如果儲夠分的話，亦可解鎖使用英雄角色專用機。玩時既要瞄準打低敵機及閃避導彈攻擊，亦要用上高超技巧避開太空船、建築物及小行星，刺激之餘平衡度亦做得好好。至於最重頭多人模式則是Galactic Assault模式，一來這個模式要集合所有星戰元素，如駕駛AT-AT Walker及戰機等載具，二來遊戲支援20對20大規模戰鬥，連開發小組都話製作時非常具挑戰性。記者在EA總部就即時同其他世界各地媒體朋友即場玩20對20對決，當然畫面表現絕佳不在話下，過程中既有《Battlefield》的爽快感，亦好有星戰的感覺，就算記者並非是星戰迷，都一樣玩得好投入。

兩年前第一集《Star Wars Battlefront》被玩家覺得耐玩性不足、模式少，非忠心星戰迷好難維持熱情玩落去，但今集明顯在各方面都作出改良，如規模比第一集大三倍，遊戲平衡性都做得幾唔錯，廠方亦有聽從Beta版推出後玩家意見再行調校，記者就覺得好好玩，若5分滿分，記者會給予4.5分。如果是星戰迷就更要留意，EA剛宣佈會在12月開始，為《Battlefront II》分批加入由電影《Star Wars: The Last Jedi》啟發的內容DLC，如新地圖及兩位新英雄角色，耐玩程度就更高。

《Star Wars Battlefront II》
平台：PS4、Xbox One、PC
推出日期：11月17日
記者評分：4.5 / 5

記者、攝影：布偉倫