韓國綜藝節目《Running Man》前成員Gary，今年4月自爆成為人夫後，忽然刪除Instagram所有照片及留言，不過前日深夜佢就終於重玩Ig(相關新聞連結： http://bit.ly/2rPccdC )，並先後上載咗三張相，噚日又再上載一張新相，雖然佢上載嘅照片僅限個人照及風景照，未見老婆，但粉絲對於佢重玩Ig都舉腳贊成。

不過有網民就質疑Gary重玩Ig呢個舉動，仲留言問Gary到底佢係唔係為咗錢先回歸玩Ig，擺明質疑Gary舉動係等錢使，不過Gary不單就冇嬲豬，反而大方回答話：「睇嚟錢喺你人生中好重要，有時間嘅話，你都去旅行吧。」

唔少網民亦力撐Gary，話Gary同Gil嘅Hip Hop組合Leessang本身有賺版稅，而Leessang亦有購買物業，所以Gary基本上不愁冇收入，而且Gary下周二亦會喺馬來西亞舉行演唱會，工作接踵而來，唔擔心冇錢使。

另外，Gary昔日「周一情侶」好拍檔宋智孝，智孝日前為雜誌影嘅新相亦都曝光。