潮媽陳慧琳（Kelly）噚日放低蝦餃仔劉昇一陣咁多，去咗油麻地救世軍長者地區服務中心派月餅，同長者提早慶祝中秋，有老人家祝佢三年抱兩，Kelly笑住話：「承你貴言！」問Kelly係咪有咁計劃？佢話：「三年抱兩最理想啦，再生一個我都願意，反正上一次陀仔都唔係咁辛苦，不過我啱啱生咗冇耐，等身體復原先，一年後再計劃都未遲。」
Kelly話公公已經買咗5個燈籠畀蝦餃仔，佢又笑住話：「我試過畀蝦餃仔聞吓月餅味道，我仲專登推晒啲工作，希望同蝦餃仔度過第一個中秋，不過家係豬流感高峯期，所以我未必會帶佢出去賞月，況且佢仲咁細個，唔識得睇月光啦！」

寫歌送愛兒

自稱仲喺適應期嘅Kelly，為咗有多啲時間陪仔，連其他節日嘅工作都推咗，問Kelly係咪要仔唔要錢，佢話：「絕對係，家都係做簡單嘅工作，又或者唔離開香港都可以。」佢又話：「我要喺佢爹哋放工前同個仔玩，佢一收工就會霸住個仔，所以我哋成日爭住抱。」家Kelly為新碟錄音，問佢有冇諗住收錄蝦餃仔把聲，Kelly話：「呢個提議都幾好喎，不過想錄佢把聲，真係要用九牛二虎之力，先至錄到一粒音，但係我就將《戀愛情色》呢首歌，填上新歌詞送畀佢聽。」