女人天生愛靚唔愛命，所以有女星為換取一張漂亮嘅人工面龐，敢去承受無比嘅痛楚同壓力。黃宗澤舊愛甄穎珊上月喺香港接受胸部改建手術，抽出以前隆胸嘅致癌物質PAAG，注入鹽水袋僭建成33C大騎樓，再做埋額前植髮手術後，本月初又去韓國接受四項整容同整形手術，前晚變完面嘅佢已經由韓國返港，等消腫後就可以正式見人。
甄穎珊接受嘅整容同整形手術，包括矯齒手術，佢將上排六隻牙套上牙套，下排牙齒就漂白；其次係割內雙眼皮同埋隆鼻手術。以前佢曾經喺鼻樑注射PAAG，醫生將呢啲物質抽出後，動手術同佢托高鼻樑，又用佢嘅鼻軟骨隆尖鼻頭；由於佢左膊後有撻手板咁大嘅胎印，順便做埋激光換膚。

眼皮又紅又腫

前晚甄穎珊返港，由女經理人陪同坐車返歸，途經旺角一間油站時，佢落車去洗手間後去買飲品，當時佢除開口罩飲檸檬茶，見佢現出深深雙眼皮，但眼皮位置又紅又腫，本來扁鼻嘅佢變成間尺鼻，同時因為整咗棚牙，令面形微變尖長，不過佢成塊面腫腫哋，相信消腫後先可以睇清新面目。
甄穎珊經理人前晚同馮仁昭傾開電話，佢話：「甄穎珊去咗韓國7日，做手術時唔會有太大壓力，因為佢最驚嘅係上次隆胸，佢都話『最難過嘅時候已經過咗』，所以佢冇乜嘢喎。」