煲呔表哥、公民教育委員會主席兼鄉議局當然議員香灼璣，喺今次嘅授勳名單中榜上有名，攞到個銀紫荊勳章，為香氏家族寫下光輝一頁。
咪以為香生咁樣已經好巴閉，查實佢嗰兩個入籍美國嘅孖仔，即係煲呔表姪仔，比起老竇更加犀利，因為佢哋雙雙被美國國務院外交部羅致，做咗美國外交官。
嘩，黃種人做美國外交官，都咪話唔勁；不過，香生一向係愛國愛港嘅鄉事人馬，又係拍《心繫家國》嘅公民教育委員會主席，佢對囝囝竟然喺掌管重要機密兼敏感資料嘅外交部做嘢，睇嚟都要向祖國備吓案，以免惹嚟勾結外國勢力之嫌。呢兩位𠵱家只有卅二歲嘅年輕外交官，都係喺美國出世，一直都係美國公民，所以考入外交部問題不大。不過，香生就估唔到兩位囝囝最終可以做到咁勁嘅位，事關佢其中一位公子讀國際關係，當外交官唔出奇；但另一位讀自己嗰行，即係城市規劃，同外交真係點都扯唔埋纜。點知兩個囝囝居然一齊去考外交官，重一齊被取錄，驚喜度自然百分百。

派去波蘭要學波蘭話

其中一個囝囝即將派去波蘭華沙，𠵱家正密密學緊波蘭話；另一個重等緊編排，睇怕都係冇雷公咁遠嗰啲地方啩。
要入去呢啲涉及國家安全嘅機構，品格審查係必經手續，奇就奇在香生第一個仔做審查時，好輕易就pass，點知到第二個，竟然有問題，明明同樣file，點解會有唔同？香生話自己係乜乜華僑聯誼會成員，唔知係咪因此出事。
香生一家近期紅運當頭，同官運亨通嘅煲呔有得揮。原來早前香、曾兩家人都有碰過頭食飯，唔知有冇互相祝賀吓一番。不過無論八方點追問，香生都唔願透露席間講過乜，可能費事俾人話佢借煲呔出名啩！


爆料熱線：29290000、27860099
報料傳真：26239278
報料電郵：[email protected]