反送中運動其中一個「打卡」熱點旺角警署，因831事件被指真相未大白，常有抗爭市民及示威者聚集，是其中一個警民衝突熱點，加上受港鐵持續封站行動影響，令旺角警署附近幾條酒吧街生意重挫。90後Gerund經營的酒吧在警署後門亦受影響，由9月下跌一至兩成，到10月起生意下插四成，更試過全日零生意。他認為，生意暴跌與警方無定向及無差別的在太子一帶狂射催淚彈有關，「已經無港鐵，現在連行都行唔到過嚟，啲催淚彈物質又有毒」，所幸業主雪中送炭願意減租，幫助Gerund撐下去，而他即使生意再差，都堅持不裁員，現只望能有雨過天青的一天。

記者：金敏琍 攝影：麥超億

市民到酒吧消遣，旨在與三五知己聯誼聊天，舒緩平日工作及生活緊張情緒，但當社會氣氛差到一個點，市民根本毫無心情消遣，雖然區選過後，社會整體氣氛好轉，生意開始稍為好轉，但他指早前確實經歷最低潮：「11月初西灣河開槍(交通警開真槍射傷青年)嗰個禮拜，我哋有兩日營業額係零，一個人都無，開業咁耐都未試過。」

Gerund表示，生意最差時港鐵經常封站及縮短行車時間，加上警方在太子鬧市瘋狂TG放題，是生意額大跌元兇，「地鐵封站，客人嚟唔到。客人嚟唔到少咗，一啲客人例如在其他地方食完飯，想返嚟呢度飲嘢，以前可能搭地鐵或者的士，現在少咗一種最主要嘅方法，所以少咗一班轉場客人......10月、11月警方不停在街上狂放催淚彈，啲客人唔單止無車搭，連行都行唔到嚟。」

去年9月，Gerund與兩個朋友合資約80萬元，頂手經營太子西洋菜北街一間酒吧，以月租7萬元承租，簽下兩年死約一年生約，經營一年，差不多回本，但修例風波引發出持續6個月的大規模抗爭，嚴重打擊旅遊業及消費零售市道。作為小商戶，Gerund認為不能倒果為因，強調政府以過時手法去管治社會是罪魁禍首，「如果你個政府唔係咁，佢哋唔會無啦啦行出嚟...點解佢哋仲選擇去做...好明顯係政府有啲嘢不足，真係忽略咗年青人嘅需求，所以搞到咁大件事，好似硬推一啲嘢，你話你有諮詢但實質上有冇呢...啲人好多時怪晒示威者，你哋成日執住個果，又唔理原因，好似舊式嘅教仔方法，你係咁打個仔冇用，你一日唔去處理、去搵個原因，咁都係解決唔到，以前啲人就話唔識教，而家冇理由用返舊方法。」

酒吧內貼上文宣，Gerund稱每個人都有表達意見權利，不怕會影響生意，相反由於有客人將酒吧分享到網上良心小店群組，令近月多了一批年輕生客，生意下跌幅度亦較其他酒吧小，「首先我哋三個股東都係一致贊成呢樣嘢，貼文宣呢樣係我哋自發性去做，如果有人唔like我控制唔到，我哋自己都有自己主張，你唔滿意可以選擇其他，你滿意、你鍾意可以嚟，呢個純粹發自內心。」

酒吧目前有一位全職員工，而兼職員工則有12至13人，Gerund稱已與拍檔取得共識，暫時不會有裁員計劃，但為節省成本會減少兼職員工上班時數，「寧願3個股東自己分少啲啲，都唔想員工受影響。」他指由9月起開始與業主傾減租，希望可以幫補支出，「我哋業主都好好，佢肯短期減我哋差唔多一成五租金，由10月至12月呢三個月，話先減咗三個月先，然後再視乎情況。」

Gerund表示，現時整體消費市道疲弱，不是進行減價或加推優惠就能令市道逆轉，故小商戶能否出生天，關鍵是政府是肯回應民意，「除非政府肯認低威，否則好難改變到市民嘅心態。」

-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇
-----------------------------
【撐學生】
召集有心人 撐學生全年睇《蘋果》
立即按此
-----------------------------
你敢爆，我敢獎！ 立即WhatsApp《蘋果》24小時爆相爆片熱線 或致電：63836568