【棟析先機】實力值過百分！低沉馬復蘇要留神（陳華棟）
蘋果日報 2019/12/14 22:54
好運多贏陳華棟棟析先機
好運多贏現時評分已降至有利水平
今季跑咗26次馬，諗都諗唔到練馬師榜排頭兩位嘅都係華籍倉口，姚本輝同呂健威響現階段跑咗出嚟，相信大家響季前都應該估唔到，有佳績交出，究竟係從練多年後功力提升，抑或係馬匹實力上乘有關？
其實依家有唔少華倉嘅實力都有所增強，可以抗衡傳統四大馬房，阿棟甚至認為今季有可能係華倉拎冠軍，呢個亦係阿棟希望睇到嘅！
另外，韋達亦係靜靜地起革命嘅勢力，首季開倉到依家已經贏咗11場，成績唔錯，以佢響香港嘅人際脈絡，日後馬房再壯大的話，絕對有力問鼎冠軍寶座。
周日（15日）第八場二班草地1400米，「好運多贏」上季初連搏四場後遇到狀態周期性低落，下半季欠態但表現仲算可以接受，踏入今季已全面復蘇。
首仗走勢已經唔錯，阿棟認為呢匹馬係值過百分，今年再嚟衝擊，得唔得就拭目以待，計實力就應該贏得。