沿海家園（1124）在3月時曾宣布，計劃向南豐旗下財務公司發行3000萬美元可換股債券，仲話雙方可能在內地房地產方面合作，一度令人憧憬此舉是南豐集團入股該公司的前奏，刺激沿海家園股價由0.49元炒高至1.05元高位，累升1.14倍。其後市場睇真啲，原來換股債行使價低至0.40元，市場憂慮日後有人會行使換股債並趁高出貨，沿海家園出現調整，跌回0.60-0.70元水平。
噚日，沿海家園突然宣布終止發換股債畀南豐，兩者關係似乎出咗問題，但就唔知係好消息定係壞消息？沿海家園股價則毫無反應，收0.75元，冇升跌。

黑客話，芬佬對於內地房地產股寵愛有加，連一向對內地房地產市場有戒心的新地（016），都要增加在內地的發展以取悅投資者，而從事內地房產業務的沿海家園，當然有芬佬注意，今次取消發換股債，可以改為配股集資，不單慳番利息支出，而配股價亦相信會高於0.40元，所以終止發債交易，對沿海家園應該有利。
早前，大摩等策略投資者以每股3.225元大手沽出永樂電器（503），套現12億元，股價應聲急挫至2.575元，搞到永樂其他股東十分唔快樂。但僅半個月，大摩見股價跌得殘，又出報告唱好，評級調升至「增持」，新目標價3.55元，以噚日收市價2.925元計，重有21.4%上升空間。似乎永樂真係畀大摩玩晒。
雨潤食品（1068）噚日又傳出有策略投資者於禁售期屆滿後出貨，每股6.05-6.20元，沽1億股，套現逾6億元。不過今次折讓幅度唔大，僅3-5.5%，暫時未知市場反應如何。不過有芬佬朋友話，最近市場關於認購反應好與壞的傳聞不可盡信，好似新地咁，明明傳話有兩三倍超購，但實際上認購者認購幾多就有幾多，花旗仲要以每股88.30元下限批出，低過包銷價89元，搞到要做蝕本生意。
阿虎