李亞男喺今年情人節嫁咗畀王祖藍，最近仲獲老公送贈1.2億大埔逸瓏灣頂樓連天台豪宅，做幸福少奶奶，雖然已經脫離「處女黨」名單上，但亞男與一班姊妹感情深厚，噚晚就相約鍾嘉欣，王君馨、苟芸慧一齊聚會。

王君馨同苟姑娘都有喺instagram貼合照，佢哋嘅素顏look獲唔少粉絲留言讚「索」，係女神化身，苟姑娘仲鬼馬加埋minion喺合照上，寫住﹕「SisterLove,thatlittleminionisourEliza(岑麗香)girl!」而君馨似乎有好大感觸，放咗好多幾姊妹昔日舊照，並用英文寫咗一大段深情說話﹕「終於來到今日。如果沒有你們幾位女孩，我在TVB的旅程會很不一樣。我向上帝祈求在來年我們姊妹感情會更穩固，不論好與壞都會支持對方，將嫉妒、比較、以及所有不屬於我主的全部拆下來。父親，我們將生命交託給你......」

而最近榮升點心店老闆娘嘅苟芸慧，早前同莊思敏爆出羅生門，雙方都話係夾錢投資開呢間以「蛋黃哥」做賣點嘅餐廳，但又唔知對方有份投資，邊個先係大股東呢?真係唔知，但今日苟姑娘就喺IGpo咗幾張同姊妹齊齊著蛋黃哥嘅T-shirt，以行動證明一班姊妹撐自己，又可以sell吓間食店。