世界盃衞冕冠軍德國隊，分組賽首場就爆大冷輸給墨西哥0：1，令眼鏡碎跌到一地都係。「賽後檢討」當然係睇下邊個係燈神，眼利嘅網民結果就有重大發現，原來燈神竟然係建制派第一大黨民建聯。事關民建聯fb喺開賽前幾個鐘，就上載咗一幅有「德國球迷」陳克勤同葛博士嘅世界盃海報，抽水介紹下德國對墨西哥場波係有得電視免費收看，張海報就大大隻字寫住「我哋撐德國隊」，列晒德國隊三場分組賽嘅比賽時間同日期。

唔少支持德國隊嘅網民，喺賽前見到呢個post，都倒抽咗一口涼氣。有網民留言，擔心德國隊今場波凶多吉少，有憤怒嘅網民仲忍唔住留言：「如果今晚德國嬴唔到，我唯你們是問！！」果不然真係出現咗意外賽果。賽後有網民去番民建聯fb留言，話係今晚係「德國隊最黑暗的一天」。希望民建聯高抬貴手，如果真係撐足德國隊三場分組賽，咁德國要出線真係凍過水喇。