金童玉女嘅故事，八方細細個睇童話故事睇得多，噚日響沙田馬場，就上演咗場現實真人版，大美人Michelle李嘉欣同許家公子Julian許晉亨拍拖，喺娛樂圈煲咗差不多大半年，繼上周日Julian爸爸許世勳隻「燦惑」，佢哋手拖手入場大晒恩愛後，噚日又再拍拖入場，事關第三場Julian隻「醉激」有份出賽。許公子噚日落沙圈已拖到大美人實一實，盡顯紳士風度，臨場聽練馬師告東尼畀貼士，Julian同Michelle依然好似打咗結咁冇分開過，八方喺欄邊睇靚人靚馬，都感受到佢哋沐浴愛河嗰種幸福。
唔知啲馬迷係咪見到大美人在場，心諗佢哋預備拉頭馬，「醉激」最後幾分鐘瘋狂落飛，獨贏賠率由59蚊跌到落29蚊變咗次熱門，可惜力拼下只得第二，美人頭馬拉不成，之不過Julian有近12萬獎金落袋，總算冇空手而回。之但係講到失落感，班捧佢哋場嘅馬迷肯定更心傷，事關連續兩個星期捧佢哋嘅「燦惑」同「醉激」，只係得後駒執番個熱P，買WP連本都回唔到！