鄺文珣、鮑起靜同傅楚惠（前名傅楚卉）今日喺深水埗為港台劇集《獅子山下2018》開工，鮑姐指劇情講述飾演義工嘅鄺文珣同傅楚惠，喺深水埗向基層派飯盒嘅時候，喺後巷遇上飾演執紙皮維生嘅佢。

育有兩子一女嘅鄺文珣，雖然一向以家庭為重，但今次答應出山拍劇，佢指劇本好吸引，「劇本寫得好感動，之前我曾經參與過幫助內地孤兒嘅計劃，同呢個理念好相似，加上今次同鮑姐合作。」鄺文珣表示如果之後再接拍劇集，佢都會考慮，但首先要同屋企人商量，佢話：「呢個劇真係好有意義，所以都將我個女放低先，借佢啲時間嚟拍劇。」鮑姐笑住爆趣事：「好好笑，有一日佢話我知10歲嘅大仔湊住1歲大嘅細女，然後話『媽咪，細妹條尿片自動跌咗落嚟。』」鄺文珣笑指：「因為冇換尿片，太重喇，所以跌咗落嚟地下。」

首次同影后鮑姐合作，會唔會有壓力？鄺文珣話：「佢好nice，完全冇壓力。」傅楚惠亦大讚鮑姐為人親貼，「鮑姐好好，成日請我哋食嘢，今日我嚟到，發現有個婆婆請我哋食燒肉，原來係鮑姐。」鮑姐話：「入型入格，劇組好認真去設計呢個造型，就連牙齒都要油黃。」

精選娛聞，喺晒《娛果》
http://fb.com/appledailyent