由樓市低潮賣到去高峯期，直至𠵱家再陷悶局，仍然仲有貨尾嘅長沙灣宇晴軒，由一期二千幾蚊呎，賣到二期最高近八千蚊呎，唔同時期入貨，家陣賣出，勁賺狂蝕嘅例子共冶一爐，香港樓市，真係高低手投資人辦嘅活教材。
中原劉雪芳表示，今個月宇晴軒已經有6宗相連戶成交，先講開心嘅例子，原業主都係02同03年買入嘅一期貨，分布2及3座，賺價由172萬到190萬元，全部有接近五成升幅。勁蝕嘅係第二期嘅1座相連，原業主04年11月買，蝕咗122萬元，跌近兩成；另一單同樣係二期，7座相連戶，原業主04年4月買入，賺36.4萬元，但係樓價過700萬元，計埋手續費都係平手執番身彩。