成功連任全國政協常委嘅星島新聞集團主席何柱國，今日接受無綫《講清講楚》訪問談及房屋土地供應問題時，再次發揮「寸王」本色，直斥「覓地委員會」（即「土地供應專責小組」）係「廢柴」，又建議將香港監獄搬去內地，期間又引述有好高級嘅中央官員關注本港樓價過高，青年置業難嘅問題，認為陳茂波可以做得更多喎。

何柱國喺節目中話呀，早前同一個「好高級」中央官員接觸後，發現對方由以往關注「港獨」，變為較關注香港青年前途同置業問題，認為本港樓價太高，應該諗辦法解決。佢喺訪問中一度出動一早預備好嘅貓紙，讀出該名「好高級」中央官員對特區政府作出以下提醒：「決不能新官不理舊帳，為積極做事者撐腰鼓勁，庸政懶者要嚴肅問責」。

佢讀完之後就話嘞：「呢條問題可能係畀陳茂波㗎喎，點解佢唔落力做啲嘢呢？咁林鄭月娥如果妳係做特首，妳咪支持佢囉！」，佢話有時「出面人」比起「裏面人」，睇嘢有時更加清楚，相信有關講法係中央官員有感而發喎。

佢覺得當局應該更積極壓抑樓價，仲要倍增境外人士買樓嘅印花稅，同時為首置、住滿18年嘅香港人提供稅務優惠。覓地就要更進取，但唔同意收返粉嶺高爾夫球場，因為好多外資企業在港，相關員工都要運動、娛樂，反建議搬遷監獄去內地，除咗騰出空地建屋，亦唔使擔心囚犯逃獄喎！

而喺訪節目播出後，星島旗下網媒巴士的報就喺傍晚有專欄文章，話炒何言談間提到陳茂波，外界因此有啲「捕風捉影」，質疑相關說法係咪對陳「有所暗示」？繼而話有人問過炒何點解讀完貓紙要提陳？話何真正意思係特區政府、即係娥特要支持陳茂波做嘢，仲話訪問中有講喎！