振英在新華社訪問中表示要回應社會求變之訴求，否則難維持繁榮穩定。佢一直打着求變口號登場，但一如其30年來評論文章，有分析、冇解決方法，所謂變，仍只停留在口號層面。大家要知道，無疑香港人對現狀不滿，但心態上就乜都要SureWin，好似一個曼聯球迷想曼聯捧聯賽冠軍，但賭波落盤就買曼城，一旦曼聯奪標，輸錢但開心贏牙骱，若輸咗，傷心但至少有贏錢。

這種SureWin心態變成社會刁民充斥。好似公共財政過份依賴賣地非經常收入問題，令官商成為利益共同體，勾地政策一方面保障公共財政收入，但同時地價越抬越高，樓價自然天天向上。如果政府改弦更張，每季不理巿場按既定名單推地，則被傳媒議員指摘為賤賣土地，向地產商輸送利益。好了，要從大處着手，改變公共收入結構，擺脫對賣地收入依賴，擴闊稅基，開徵消費稅。但在諮詢期已通街喊打，未完諮詢期被迫腰斬。
香港人心態上係唔想為長途目標付出短期代價，如果一旦慽甩靠地產金融，要捱一段鹹苦，唔係未試過，老董死唔信邪，大搞產業政策，希望幫巿民戒甩，腳踏實地。結果所有產業冇一樣彈出，提供到足夠高增值就業機會，到曾蔭權上場，惟有重回舊路。曾蔭權同董建華有分別，老董時代所有人一齊仆街，人民內部唔會分化，冇仇富反商，只有倒董。曾蔭權時代人民內部分化，有樓就騎騎笑，上唔到車就罵娘，變成仇富反商。老董年代積極求變，阿松大搞本土經濟，搞巿集小販，好快冇晒影。乜港物港就講多過做，唔信不妨去九龍塘創新科技中心逛個圈，甲級公帑補貼租金寫字樓，其實邊有咁多真正需要扶持嘅創新科技或文化產業。

所謂變，講到今日究竟想點變？煲呔任內不停派錢正正是本地短視社會所逼出來的政策，香港官商精英係一個搵水至上、知識含量低嘅階層，SmartAss充斥，對所謂社會求變，若過份認真，救世主上身，效法摩西帶領港人去應許之地，最後只會再一次齊齊仆。
添馬男