「百年老店」金銀業貿易場，自從轉莊由Haywood張德熙做理事長後，當堂朝氣勃勃。熙哥話，除咗密鑼緊鼓籌備4月中推出嘅人民幣黃金公斤條，家仲忙緊另一樣嘢……就係重開貿易場嘅體育康樂組。
頭炮係搵佢哋嘅監事羅啟義勇闖珠穆朗瑪峯，然後喺世界之巔，幫貿易場插旗！
看似無厘頭，但原來背後大有諗頭。熙哥話，一來，羅生本身係攀山發燒友，搵佢去勇闖世界之巔插旗，可以體現貿易場要再闖高峯呢個理念同精神。

6月參賽扒龍舟

二來，羅生同佢兩個拍檔加埋150歲，佢好想帶個正能量message畀香港嘅新一代，就係乜嘢年紀都可以不畏艱難接受挑戰，呢個就係真正嘅香港精神。呢個月13號，熙哥會喺會展搞個授旗儀式，到時仲會有1500人幫羅生打氣。
講番貿易場個體育康樂組，熙哥話之前因為黃金市道唔好，大家掛住搞好生意，無乜心情同時間，所以就停辦咗。家陣黃金市道暢旺，所以佢堅決重開呢個組，希望振奮貿易場嘅士氣，同埋畀啲會員更多聯誼、交流機會。緊接珠峯插旗，熙哥話6月嘅2011國際龍舟邀請賽，佢哋會派一隊出賽，之後仲會陸續有活動嚟㖭。新人事，果然有新作風！

李華華
mailto:[email protected]