睇李碧華在《壹週刊》寫「紅耳墜」，將杞子講到出神入化，服晒。李小姐文筆如此佳妙，杞子如此神奇，你唔睇，係你嘅損失。
睇完靚文章，成身鬆晒，於是出街行一行，以免坐在辦公室內過久，不健康。講到健康，食環署做咗個報告，捉正香港人怕肥怕高血壓嘅心理，全城報紙大篇幅刊登，威晒。此報告乃係講廣東人飲食習慣，老人家每日上茶樓飲早茶，一盅兩件，吸收脂肪過多，甚不健康，譬如左丁山鍾意食嘅山竹牛肉，脂肪百分比高達百分之六十九，好不嚇人。

但係諗真吓，如果係咁，廣東人點解唔係全國最肥之人呀？上一代人（六十歲以上）之中，甚少見到大肥佬，反而四十幾、五十零嘅中年人，就好多腹大便便。唔通廣東人上茶樓，吞極脂肪都唔肥？食環署嘅研究報告是否唔夠全面，以偏概全？
馬主Ｈ偶然中發現，川寧紅茶（佢鍾意飲EarlGrey清茶）有去漬作用，某次佢誤打誤撞，用EarlGrey茶葉沖滾水洗茶杯，發現茶杯漬冇晒，於是諗起，飲清茶，唔加糖，唔加奶，是否更健康呢？佢冇科學根據，但知道樓上蔡瀾好食豬油撈飯、東坡肉冇有怕，照計一定吸收好多脂肪啦，不過蔡瀾食飯，除紅酒外，一定飲又濃又黑，好多人見到都怕怕嘅普洱茶，此乃蔡瀾保健秘方，廣東老人家亦好飲普洱，或者因為如此，食多幾件鮮竹卷都唔怕。
飲食飲食，有食就有飲，食環署應該做多一項調查，就係茶客食完鮮竹卷、腐皮卷之後，佢哋飲普洱、壽眉，對吸收脂肪有乜影響。左丁山經常以為，食蛋撻、山竹牛肉而伴以冰凍可樂七喜（一般年輕人之喜好）就如火上加油，冇理由係健康嘅配搭。講食廣東點心唔講飲熱茶，食環署報告未可盡信。