【丁力太深刻】《雪山飛狐》係轉捩點 呂良偉:令觀眾重新接受我
呂良偉丁力雪山飛狐
呂哥話《雪山飛狐》係佢演藝生涯嘅轉捩點(電視截圖)
呂良偉同太太楊小娟、蔡一智夫婦、馬詩慧等,今日喺灣仔出席一個有關下午茶嘅發佈會,而今次嘅下午茶,更係由名媛馬梓詠(Helen)親身創作。
呂哥啱啱去完非洲同歐洲兩個月,佢話今次去係同動物影相,佢話:「子丹都有份,係幾家人一齊去,凌晨5點出發,睇下啲獅子同豹,之後就去咗歐洲。」問子丹旅行時有冇受《冰封俠2》嘅是非影響心情?呂哥就話:「當時未受到困擾嘅,知道話佢大牌、喺片場干預製作,我識咗佢廿幾年,佢嘅性格係直啲,因為佢喺外國長大,佢本身嘅身份係好特別,又係監製又係演員又係動作導演,之前喺《導火線》裡面,佢都會逐個解釋清楚,喺片場係冇問題嘅,我覺得佢唔會大牌,工作嘅時間係好專業,佢係百分百喜愛電影,覺得要做嘅就一定會做。」呂哥笑言之後約子丹食飯之餘仲要一齊飲酒安慰下佢。
提到無線前高層劉天賜細說金庸武俠片喺無線同佳視嘅爭奪戰,曾主演《雪山飛狐》嘅呂哥就話:「《雪山飛狐》係1985年嘅,呢套劇係我電影生涯裡面一個轉捩點,俾觀眾重新接受我係一個演員,因為嗰陣《上海灘》丁力太深刻,直至呢套劇大家終於覺得我係可以演其他戲,金庸係我偶像,佢嘅作品由細睇到大陪伴,有歡樂嘅時光,《鹿鼎記》睇到有笑有淚。金庸走好唔捨得,希望一路好走。」
提到無綫拍《雪》劇因為唔夠budget,所以要喺邵氏舊山噴雪扮雪山,呂哥諗番起都笑住話:「拍嗰陣時係3月份,好凍,大家着曬皮草,但尾段就喺6月嘅時候拍,大家裡面着晒短褲,呢個係好印象深刻。杜琪峰喺劇入面居功不少,好多大場面,係好經典,仲攞埋紐約最佳電視金獎,亦都多謝天林叔俾機會。」
精選娛聞,喺晒《娛果》
http://fb.com/appledailyent