特區政府搞緊清潔大行動，個個司局長都要親身參與，好似食衞局局長高永文曾經攞掃把掃街。環境局局長黃錦星今日就去到元朗出席「全城清潔2015@家是香港」元朗區啟動禮，致辭時呼籲所有市民克盡己任，保持環境清潔，其後喺元朗區議會主席梁志祥同元朗區議員梁福元等人陪同下大派清潔包。

沿途唔少人同佢SayHi；雖則被指似真人版「大嘥鬼」，但細路哥見到佢一啲都唔驚，有人仲豎起拇指畀like咁(雖則冇乜笑容噃)，但已經O氹到星爺high爆，豎返手指公和應。吖，新任民政事務局局長劉江華仲未落區清潔喎，唔知佢會唔會抹垃圾桶嚟自嘲呃like？