立法會選舉吹雞，開始入波埋位，除咗準備大規模抹黑民主派議員（例如公然誹謗民協嘅馮檢基向阿婆派錢拉票），估唔到第一個成為犧牲品嘅，反而係準備喺新界東直選、愛國撐董嘅自己友朱幼麟。
飛天朱恨直選出線，早已流晒口水。佢設計埋圖案，較早前亦四處嗌定咪。好可惜，新界東只得七席，頭四席民主派攞硬，親中嘅田少同民建聯劉江華包緊尾，若然飛天朱殺入嚟，分分鐘分薄晒田少同哨牙劉啲飛。
傳聞國家左諗右度，惟有犧牲飛天朱，執行組織紀律，勸退佢。咁又係，飛天朱雖然好親中，但佢嘅生活作風，又唔似一個中國人。佢太過愛護動物，曾經多次膽粗粗咁寫信畀佢所敬愛嘅黨中央，叫佢哋保護啲野生動物，唔好生劏咁多老虎、貓狗呀咁。愛護動物嘅人道作風，係鬼佬所為，中國人割熊取膽、劏貓飲血，一早慣晒，又點到飛天朱以假洋鬼子身份指指點點，干預十三億人民嘅飲食生存權？得罪咗祖國唔知，飛天朱都算大懵。