當年今日
關於我們

隔牆有耳:
小店義賣捐眾新聞 
食碗麵 撐新聞自由 - 李八方

蘋果日報 2019/06/03 02:20

隔牆有耳盛記麵家眾新聞. 眾籌

沙田瀝源邨老字號麵店「盛記麵家」,噚日搞咗個「撐記者.食碗麵」義賣行動,上午9點至下午3點嘅所有收入,都會捐畀網媒「眾新聞」。老闆B哥話,舖頭每年都有一次義賣日,今年因自己最尊重記者,尤其最敬重曾經遇襲嘅《明報》前總編劉進圖,大讚佢有份創辦嘅「眾新聞」報道不偏不倚,所以決定幫佢哋籌錢。B哥唔只出錢又出力,仲借埋舖頭天井出嚟,畀義工搞義賣,係咁多年嚟第一次。
1,500人幫襯 生意額逾30萬
噚日好多街坊支持㗎,坐滿成間舖,門口排晒長龍,仲有唔少政界同新聞界人物現身,包括公民黨楊岳橋、記協前主席岑倚蘭、同前立法局主席黃宏發等等。八方問咗AY,佢大讚盛記出品好味道,有麵食又可以支持記者,所以朝早做完街站就即刻叫埋成班好友撐場。佢哋食麵之餘仲買咗唔少義賣小食。
empty
前立法局主席黃宏發亦有到場幫襯。
到下晝3點埋單計數,有接近1,500人幫襯,生意額超過30萬。不過B哥話,籌到幾多錢其實都係小事,自己只係略盡綿力,最緊要係透過今次義賣,令香港人關注新聞界嘅困境,明白記者工作辛酸,希望大眾以後繼續支持新聞界嘅運作呀。

李八方
empty