當年今日
關於我們

【黎明騷取消】歌迷崩潰Leon單手插袋現身鞠躬安撫

蘋果日報 2016/04/28 06:00


「對唔住所有觀眾所有朋友,因為我哋今日個演唱會係要取消,原因係食環署唔批,因為消防條例話我哋嘅布料雖然係防火料,但唔係英國認可嘅規條,所以我哋盡快解決所有善後工作,睇下有咩可以改變嘅…」「我只能夠講好對唔住!萬二分對唔住!」

真係點估得到,一個投資7千萬嘅演唱會,竟然到臨開騷之前先至話唔俾牌?搭棚同申請牌照唔係今時今日嘅事,點解到Lastminute先至話唔批咁兒戲?

左手插袋,身穿印有個唱logo白Tee、上面仲印住工作人員字樣嘅黎明,傍晚6時半左右現身會場,分別於正門及鐵絲網旁的fans道歉。驚聞個唱取消的歌迷甫見黎明即尖叫起哄,黎明即做了一個「咮」的手勢,要大家冷靜。

面對咁大打擊,黎明仍能保持冷靜,左手插袋,右手執大聲公向fans解釋取消原因及道歉。當黎明講到「對唔住大家!」時,fans即高呼:「唔使對唔住呀,我支持你!」之後黎明又向fans鞠躬,才返回後台。