恭喜晒，有紅籌之父之稱嘅梁伯韜（Francis）踏入2017年即有喜事，噚日佢娶新抱，做新老爺，年約30嘅囝囝Francis Junior娶混血兒太太，佢哋喺中環四季酒店擺酒，筵開大約50席，特首梁振英、長和（001）大班霍建寧都有到賀。
梁伯韜喺財經界無人不識，佢同超人李嘉誠關係密切，曾經被譽為李嘉誠嘅御用銀行家。佢平時甚少提及家人，聽聞佢囝囝Francis亦都係賓架，通常喺美國生活，太太Hannah係混血兒，樣子相當標緻。

據在場賓客透露，梁特噚晚亦有到賀，不過只逗留一陣就離開，霍建寧與梁伯韜同為李嘉誠嘅好幫手，二人合作無間，當然有畀面出席。講到賀禮人情之類，近年好多有錢人都唔興收人情，梁伯韜一樣，要求賓客捐錢去某幾個指定嘅慈善機構，擺酒順便做善事，一舉兩得。
講番61歲嘅梁伯韜，佢年僅33歲就同英國人杜輝廉合資創辦投資銀行百富勤，90年代包攬好多大型央企來港上市，因而有紅籌之父之稱，雖然1998年因亞洲金融風暴沒頂，但佢繼續活躍於金融界，現為私募基金CVC高級顧問。
舊年佢忽然高調起來，經常以香港上市公司商會主席身份，批評證監會同港交所（388）改革上市架構嘅建議。有意參選特首嘅葉劉淑儀舊年底舉行造勢大會，佢唔係選委，都聽足全場。

李華華
mailto:[email protected]