破解京華酒店爆發沙士之謎嘅「神探」曾浩輝醫生，好大機會接任梁栢賢做衞生防護中心總監，雖然「神童輝」𠵱家只係顧問醫生，總監個位係D4，但因為佢追蹤傳染病了得，面對傳媒尖銳問題表現一流，所以「跳級」升職呼聲最高。
梁栢賢農曆年後就會跳槽醫管局，衞生署好快會開board揀蟋，衞生官員話「神童輝」處事冷靜，又識面對鏡頭，所以係大熱門。不過衞生署入面都有其他適當人選，好似處理過97年禽流感嘅麥國恆，仲有搞感染控制嘅翁維雄醫生都有機，衞生署高層諗緊，或者由唔同人輪流做呢個位。
至於成立咗唔夠一年嘅食物安全中心，專員麥倩屏俾啲棘手嘅食物問題、好似毒蛋油魚搞到頭都暈，既然吃力不討好，佢索性退休唔撈，接班人未定，本來副手鍾偉雄有得諗，但佢喺蘇丹紅蛋嗰鑊嘢揹晒鍋，唔慌有運行。