現年52歲嘅劉美君，喺80年代憑大膽情慾歌《午夜情》爆紅，之後嘅《最後一夜》、《愛是無涯》等都好受歡迎，08年喺紅館舉行處女演唱會後，相隔九年，將喺10月14及15日再踏紅館舉行「劉美君千色演唱會」。不過，據知劉美君嘅個唱海報，竟然被紅隧以驚嚇為由強迫下架！
呢張海報有兩個劉美君，一個係烈焰紅唇靚樣，另一個係噬大口嘅猙獰表情，效果出位。據了解，有關當局認為海報或會令人產生幻覺、驚嚇，擔心會造成交通意外，所以唔能夠通過審批。海報概念原意展現劉美君多變一面，對於海報被禁，劉美君以短訊回覆：「第一下反應係愕然，突然間被ban咗張海報，但係再諗吓係開心嘅，因為貫徹劉美君係要被ban吓。」

怕造成意外

劉美君所屬環球唱片發言人表示：「上個禮拜四（22日）收到通知，都冇辦法，因為呢個係當局監管機制，怕會造成交通意外，公司惟有配合，重新設計另一款海報。」為咗可以如期喺今日出廣告，環球喺短時間內重新提交新版本，劉美君面上嘅驚嚇影像被消失，表達唔到海報原意！